ကလောက်မိုင်နင်း(Cloud mining)ကတော့ ပြင်ပအဖွဲ့အစည်းများမှ တွက်ချက်နိုင်မှုအင်အား(Computing Power)ကို ငှားရမ်းခြင်းဖြင့် ဒစ်ဂျစ်တယ်ငွေကြေးကို တူးယူတဲ့ လွယ်ကူတဲ့ နည်းလမ်းတစ်ခု ဖြစ်ပါတယ်။
လွန်ခဲ့တဲ့ ဆယ်စုနှစ်များမှာ နာမည်ကြီး ဆော့ဖ်ဝဲ ကွန်ပြူတာကုမ္ပဏီတိုင်းက နေ့ရောညပါ ဂဏာန်းများ တွက်ချက်နေတဲ့ ကွန်ပျူတာများနဲ့ ပြည့်နေတဲ့ မြေအောက်ခန်းများကို ထိန်းသိမ်းထားရှိကြပါတယ်။ အားကစားရုံလောက် ရှိတဲ့ အခန်းများက ဆာဗာ(Server)များအတွက် အမြဲ မီးများထွန်းထားပါတယ်။
ဒါတွေ အားလုံးက ကလောက်တွက်ချက်ခြင်း(cloud computing)ဆိုတဲ့ ခေတ်မှာ ပြောင်းလဲသွားခဲ့ပါတယ်။ တန်ဖိုးကြီး မြေနေရာရဲ့ မြေအောက်ခန်းများအစား ဆောဖ်ဝဲကုမ္ပဏီများကတော့ အခြား နေရာများမှာ ထားရှိပြီး အားကောင်းတဲ့ စက်များနဲ့ ပြည်နေတဲ့ ဂိုထောင်များကနေ တွက်ချက်နိုင်မှုအင်အားကို ငှားရမ်းပြီး အသုံးပြုလာကြပါတယ်။
ကလောက်မိုင်းနင်းကလည်း ဒီ သဘောတရားအတိုင်း တွက်ချက်နိုင်မှုအင်အားကို ဒစ်ဂျစ်တယ်ငွေကြေးများ တူးယူဖို့ ငှားရမ်းခြင်း ဖြစ်ပါတယ်။ ဒစ်ဂျစ်တယ်ငွေကြေးများ တူးယူခြင်းကတော့ အားကောင်းတဲ့ ကွန်ပျူတာများကို အသုံးပြုပြီး ဘစ်ကွိုင်၊ လိုက်ကွိုင်၊ ဒေါ့ကွိုင်လိုမျိုး ကွိုင်များကို တူးယူခြင်းပဲ ဖြစ်ပါတယ်။ ဒီလို ကွိုင်များကို ကိုယ်တိုင် တူးယူဖို့အတွက် ဈေးကြီးတဲ့ ကွန်ပျူတာတွေကို ဝယ်ယူမယ့်အစား ကမ္ဘာအနှံမှာ ရှိတဲ့ ကလောက်မိုင်းနင်းကုမ္ပဏီများကနေ ကွိုင်တူးသူအဖြစ် တွက်ချက်နိုင်မှုအင်အားကို ငှားရမ်းနိုင်ပါတယ်။
ဒါ့အပြင်၊ ကလောက်မိုင်းနင်း ဝန်ဆောင်မှုအတွက် ငွေပေးချေခြင်းဆိုတာကတော့ တွက်ချက်မှု အားကောင်းတဲ့ အစုအဝေးရဲ့ အစိတ်အပိုင်းတစ်ခုကို ငှားရမ်းထားခြင်းပဲ ဖြစ်ပါတယ်။ အဲဒါကတော့ ဘစ်ကွိုင်ကို ရရှိနိုင်မယ့် အနိုင် ရရှိတဲ့ ဟက်ရှီ(Hash)ကို ထုတ်လုပ်ဖို့အတွက် အခြား အင်အားနည်းတဲ့ ဘစ်ကွိုင်တူးယူသူတွေကို အနိုင်ယူနိုင်ခြေ များစေပါတယ်။
ကလောက်မိုင်းနင်းကတော့ ဘစ်ကွိုင်နဲ့ မူရင်း အီသာရီရမ် ဘလော့ချိန်းလိုမျိုး အားကောင်းတဲ့ တွက်ချက်နိုင်မှုအင်အားကို အသုံးပြုပြီး ဒစ်ဂျစ်တယ်ငွေကြေးအသစ်တွေကို တူးယူတဲ့ အလုပ်သက်သေ(Proof-of-work)စနစ်မှာပဲ အသုံးပြုနိုင်ပါတယ်။
ကလောက်မိုင်းနင်းကတော့ စုဆောင်းမှုသက်သေ(Proof-of-stake)စနစ်လိုမျိုး ပါဝင်လိုတဲ့ ကွန်ရက်ထဲမှာ ကွိုင်များကို စုဆောင်းထားပြီး ဘလော့အသစ်များ အတည်ပြုခြင်းနဲ့ ဒစ်ဂျစ်တယ်ငွေကြေးအသစ်များကို ရလဒ်အဖြစ် ရရှိတဲ့ စနစ်မှာ အသုံးမပြုနိုင်ပါဘူး။ ဒါပေမဲ့ အီသာရီရမ် 2.0၊ ဆိုလာနာနဲ့ EOS လိုမျိုး စုဆောင်းထားရှိတဲ့ ဝန်ဆောင်မှုကတော့ မိမိရဲ့ ကွိုင်ကို အခြား အတည်ပြုသူဆီကို အပ်နှံထားပေးပြီး အကျိုးအမြတ် အချို့ကို ရရှိစေပါတယ်။ ဒါကတော့ လုပ်ဆောင်မှုအပိုင်းမှာ ကလောက်မိုင်းနင်းနဲ့ ဆင်တူပါတယ်။
ဒစ်ဂျစ်တယ်ငွေကြေး ကလောက်မိုင်းနင်းကို ဘယ်လို စတင်နိုင်လဲ။
ကလောက်မိုင်းနင်းကတော့ ပုံမှန် ဒစ်ဂျစ်တယ်ငွေကြေးမိုင်းနင်းများလို စနစ်ထည့်သွင်းခြင်းတွေ ဘာမှ လုပ်စရာ မလိုအပ်ပါဘူး။ မိုင်းနင်းအတွက် အထူးလိုအပ်တဲ့ ဟာ့ဒ်ဝဲ(Hardware)တွေ ဝယ်ယူခြင်း၊ ထိန်းသိမ်းထားရှိခြင်း (သို့) လျှပ်စစ်မီတာခ ပေးဆောင်ခြင်းများ လုပ်ဆောင်ဖို့ မလိုအပ်ပါဘူး။
အဲဒီ့ အစား၊ အောင်မြင်တဲ့ မိုင်းနင်းအစုအဖွဲ့ကို ရွေးချယ်ပြီး ဟာ့ဒ်ဝဲအချို့ ငှားရမ်းကာ မိုင်းနင်းအစုအဖွဲ့ကနေ ငွေရရှိတဲ့ အထိ စောင့်ဆိုင်းဖို့ လိုအပ်ပါတယ်။ ပြီးတော့ တူးယူလိုတဲ့ ဒစ်ဂျစ်တယ်ငွေကြေးကိုလည်း ရွေးချယ်ရမှာ ဖြစ်ပါတယ်။ ဘစ်ကွိုင်၊ အီသာရီရမ်နဲ့ ဒေါ့ကွိုင်တွေကတော့ မိုင်းနင်းပူးစတပ်(MiningPoolStats.com)အရ အကြီးမားဆုံး မိုင်းနင်းအစုအဖွဲ့များ ရှိကြပါတယ်။
အန့်ပူး(Antpool)၊ ပူးအင်(Poolin)၊ အက်တူးပူး(f2pool)နဲ့ စလပ်ပူး(Slush Pool)တို့ကတော့ ပုဂ္ဂလိက အသုံးပြုသူများကို ဝန်ဆောင်မှုပေးနေတဲ့ ဘစ်ကွိုင် မိုင်းနင်းအစုအဝေးများထဲက ဖြစ်ပါတယ်။ ဖောင်ဒရီ ဒစ်ဂျစ်တယ်(Foundry Digital)ကတော့ အဖွဲ့အစည်းဆိုင်ရာ ရင်းနှီးမြှုပ်နှံသူများကို ဝန်ဆောင်မှုပေးနေတဲ့ မြောက်အမေရိက မိုင်းနင်းအစုအဖွဲ့ဖြစ်ပါတယ်။
ကလောက်မိုင်းနင်း ဝန်ဆောင်မှုကို စတင် အသုံးပြုဖို့ ဒါတွေ လုပ်ဖို့ လိုအပ်ပါတယ်။
- ကလောက်မိုင်းနင်း ဝန်ဆောင်မှုပေးသူကို ရွေးချယ်ပြီး တူးယူလိုတဲ့ ကွိုင်ကို ရွေးချယ်ပါ။
- အကောင့်တစ်ခု ဖွင့်ပါ။
ဆိုဒ်တစ်ခုချင်းစီမှာ ဝန်ဆောင်ကြေး၊ ဝန်ဆောင်မှုနဲ့ ကွိုင်တူးယူသူတွေက ကမ်းလှမ်းရတာတွေက အနည်းငယ် ကွဲပြားပါတယ်။
ဘစ်ကွိုင် ဟက်ရှီနှုန်း(Hashrate)ရဲ့ 15%ခန့် ရှိတဲ့ အန့်ပူး(Antpool)မိုင်းနင်းအစုအဖွဲ့ကတော့ အကောင့်တစ်ခု ဖွင့်ခြင်း၊ မိုင်းနင်းပူးရဲ့ ဆောဖ်ဝဲ ဒေါင်းလုပ်လုပ်ခြင်း၊ မိုင်နာ(ကွိုင်းတူးရာမှာ အသုံးပြုမယ့် ဆောဖ်ဝဲ) ရွေးချယ်ခြင်းတွေ ပြုလုပ်ဖို့ လိုအပ်ပါတယ်။ ဆိုဒ်ကတော့ ထိရောက်မှု ရှိပြီး အမြတ်အစွန်းရစေမဲ့ မိုင်းနင်းစက်တွေကို စီမံခန့်ခွဲပေးပါတယ်။ မိုင်နာကိုလည်း ငှားရမ်း အသုံးပြုနိုင်ပြီး အကျိုးအမြတ်ကို မိုင်းနင်းပြုလုပ်နေတဲ့ ငွေကြေးအတိုင်း ပုံမှန် ရရှိစေပါတယ်။
ကလောက်မိုင်းနင်းက အကျိုးအမြတ် ရှိပါလား။
ဟုတ်ကဲ့၊ ရနိုင်ပါတယ်။ မိုင်နာများ ငှားရမ်းဖို့ ငွေပေးချေရခြင်းနဲ့ မိုင်းနင်းအစုအဖွဲ့တွေကနေ သင်ရဲ့ အကျိုးအမြတ်ကို ဖြတ်ယူမှုများ ရှိခြင်း အစရှိတဲ့ ကြိုတင်ကုန်ကျစရိတ်တွေကတော့ ရှိနိုင်ပေမဲ့ အဲဒါကတော့ တန်ပါတယ်။
အကျိုးအမြတ်ကတော့ မိုင်းနင်းအစုအဖွဲ့တွေက အသုံးပြုတဲ့ မိုင်နာတွေရဲ့ အင်အားနဲ့ ဈေးကွက် အခြေအနေအပေါ်မှာ မူတည်ပါတယ်။ မိုင်နာအသစ်တွေက မိုင်နာအဟောင်းတွေထက် အင်အား ပိုမို ကောင်းမွန်မှာ ဖြစ်ပြီး ကွိုင်ကို များများ ရရှိစေမှာ ဖြစ်ပါတယ်။ ဈေးကွက် အခြေအနေဆိုတာကတော့ ဥပမာအားဖြင့် မိမိက ဘစ်ကွိုင်ကို အမေရိကန် ဒေါ်လာလိုမျိုး ပုံမှန်ငွေကြေးအဖြစ် ရောင်းချခြင်း မလုပ်ဘူးဆိုရင် ဘစ်ကွိုင်ဈေး အတက်အကျပေါ်မှာ အကျိုးအမြတ်က မူတည်နေမှာ ဖြစ်ပါတယ်။
မတူညီတဲ့ ကွိုင်တွေမှာ မတူညီတဲ့ ငွေကြေးမရေရာမှုတွေ ရှိပါတယ်။ ဥပမာ အန့်ပူးမှာဆိုရင် ဘစ်ကွိုင်ကတော့ တဲရာဟက်ရှီ(terahash) တစ်ခုမှာ $0.2900 ရရှိစေပြီး၊ အီသာရီရမ်ကတော့ $0.3044 ရရှိစေပါတယ်။ ဒီလို ကွဲပြားမှု အနည်းငယ်လေးတွေက ဟက်ရှီအားကောင်းတဲ့ မိုင်နာတွေကို ငှားရမ်းတဲ့ အခါမှာ ပေါင်းစပ်ဖြစ်ပေါ်လာနိုင်ပါတယ်။
ကလောက်မိုင်းနင်းက အန္တရာယ်ရှိပါသလား။
ကလောက်မိုင်းနင်းကတော့ ဒစ်ဂျစ်ငွေကြေးတူးဖော်ဖို့အတွက် ဘစ်ကွိုင်(သို့) မိမိ တူးချင်တဲ့ ကွိုင်တွေ မိုင်းနင်း လုပ်ဖို့အတွက် လိုအပ်တဲ့ ဟာ့ဒ်ဝဲတွေ ပိုင်ဆိုင်ခြင်း ရှိမရှိကို စစ်ဆေးခြင်း မရှိဘဲ အခြားသူအပေါ်မှာ မှီခိုနေတာ ဖြစ်လို့ အန္တရာယ် ရှိပါတယ်။
များပြားလှတဲ့ အယောင်ဆောင် ကလောက်မိုင်းနင်းဝန်ဆောင်မှုတွေကတော့ ဘစ်ကွိုင်မိုင်းနင်းလုပ်တယ်လို့ ဆိုကြပေမဲ့ မိမိရဲ့ ပိုက်ဆံများကိုပဲ လိမ်လည် ယူဆောင်သွားတာပဲ ဖြစ်ပါတယ်။ USDမိုင်နာ(USDminer)ကတော့ အဲဒီလို အယောင်ဆောင်များထဲက တစ်ခု ဖြစ်ပါတယ်။ ၎င်းတို့ကတော့ နာမည်မဲ့ပုံစံနဲ့ ပလက်ဖောင်းကို စီမံခန့်ခွဲနေတဲ့သူကို မသိနိုင်အောင် ပြုလုပ်ထားပြီး အချိန်တိုအတွင်းမှာ အလွန် မြင့်မားတဲ့ အကျိုးအမြတ်ကို ကတိပြုကြပါတယ်။ အယောင်ဆောင်ဆိုဒ်တွေကို သိရှိနိုင်တဲ့ အခြားအချက်တွေကတော့~
- ဝဘ်ဆိုဒ် စာလုံးပေါင်းအမှားများ
- လူမျက်နှာများ အစား ရှယ်ယာများရဲ့ ဓာတ်ပုံကို သက်သေအဖြစ် ထားရှိခြင်း
- မှားယွင်းတဲ့ ကုမ္ပဏီလိပ်စာ (သို့) ကုမ္ပဏီလိပ်စာ လုံးဝ မရှိခြင်း
နာမည်ကြီးတဲ့ မိုင်းနင်းအစုအဖွဲ့များကို အသုံးပြုခြင်းက အန္တရာယ်ကို လျော့နည်းစေနိုင်မှာ ဖြစ်ပါတယ်။
ရှေ့မှာ ပြောခဲ့တဲ့အတိုင်း ဈေးကွက်ရဲ့ အခြေအနေအပေါ်မှာလည်း မူတည်ပါတယ်။ ဘစ်ကွိုင်နဲ့ အခြား တူးယူနိုင်တဲ့ ဒစ်ဂျစ်တယ်ငွေကြေးတွေကတော့ ဈေးနှုန်းက အချိန်တိုအတွင်းမှာ အကြီးအကျယ် ပြောင်းလဲခြင်းလိုမျိုး အတက်အကျ အရမ်း မြန်ပါတယ်။ ဒါကတော့ မိမိ တူးယူနေတဲ့ ကွိုင်က ဈေးနှုန်းကျဆင်းသွားခြင်းလိုမျိုး ဖြစ်နိုင်တာကြောင့် မိမိရဲ့ ရင်းနှီးမြှုပ်နှံထားတဲ့ အရင်းအနှီးကို အန္တရာယ်ဖြစ်စေနိုင်ပါတယ်။
ထပ်ပြီးတော့ ကလောက်မိုင်းနင်းအတွက် စည်းမျဉ်းစည်းကမ်းပိုင်းဆိုင်ရာ အန္တရာယ်များစွာလည်း ရှိပါတယ်။ ဥပမာ သက်သာတဲ့ လျှပ်စစ်မီတာခနဲ့ မိုးတွင်းမှာဆိုရင် အစိမ်းရောင်စွမ်းအင်ကို အသုံးပြုနိုင်တာကြောင့် ကလောက်မိုင်နာ အများကြီးက တရုတ်နိုင်ငံမှာ ရှိခဲ့ဖူးပါတယ်။ ဒါပေမဲ့ 2021ခုနှစ် နွေဦးမှာတော့ တရုတ်နိုင်ငံက ဒစ်ဂျစ်တယ်ငွေကြေး တူးခြင်းလုပ်ငန်းကို ဖြိုခွဲခဲ့ပြီး ကွိုင်တူးသူတွေကို ပိတ်သိမ်းခြင်းနဲ့ အခြားကို ပြောင်းရွှေ့ဖို့ ဖိအားပေးခဲ့ပါတယ်။ ဒါကတော့ တရုတ် မိုင်းနင်းအစုအဖွဲ့ကနေ မိုင်နာများကို ငှားရမ်းပြီး အသုံးပြုနေသူတိုင်းကို ဝင်ငွေဆုံးရှုံးစေခဲ့ပါတယ်။
အခြားနိုင်ငံတွေမှာလည်း ဒစ်ဂျစ်တယ်ငွေကြေး တူးခြင်းကို ပိတ်ပင်ထားပါတယ်။ ၎င်းကတော့ လျှပ်စစ်အင်အား အများကြီး လိုအပ်ခြင်း၊ အချို့ လျှပ်စစ်က သဘာဝ သယံဇာတတွေကို လောင်ကျွမ်းစေခြင်းမှ ရရှိခြင်းနဲ့ အစိုးရအချို့ကတော့ အဲဒီ့အချက်တွေက သဘာဝပတ်ဝန်းကျင်ကို အန္တရာယ်ဖြစ်စေနိုင်တယ်လို့ ယူဆလို့ပဲ ဖြစ်ပါတယ်။
ဒါပေမဲ့လည်း ဒီ အချက်တွေက ကွိုင်တူးတဲ့ စက်တွေကို ကိုယ်တိုင် ဝယ်ယူခြင်းထက် ကလောက်မိုင်းနင်းကို အသုံးပြုတဲ့အခါမှာ များစွာ နည်းပါးတယ်ဆိုတာကို သတိပြုသင့်ပါတယ်။ ကွိုင်းတူးဖို့အတွက် အထူးပြုလုပ်ထားတဲ့ ဟာ့ဒ်ဝဲတွေက ဈေးကြီးပြီး၊ ကွိုင်တူးခြင်းနဲ့ ထိန်းသိမ်းခြင်းတွေကလည်း ဈေးကြီးပါတယ်။ စီးပွားရေး မကောင်းတဲ့ အခါမျိုးမှာဆိုရင် ကွိုင်တူးဖို့အတွက် ဝယ်ယူထားတဲ့ ဟာ့ဒ်ဝဲတွေက တန်ဖိုး အလွန် ကျဆင်းသွားနိုင်ပါသေးတယ်။
သတင်းအရင်းအမြစ်: Coindesk
❄️❄️❄️❄️❄️❄️❄️
3. ရင်းနှီးမြှုပ်နှံမှုဆိုင်ရာ အဆိုအမိန့် |